ປະສົບການຂອງຂ້ອຍ

ດົນນານມາແລ້ວ ທີ່ເວັບບອດ pnomsin ທ່ານອາຈານກັນຫາ ໄດ້ຂຽນເລືອງ appserv ເອົາໄວ້

ຫາກໍ່ມີອາການສົນໃຈ ເມື່ອ2ເດືອນກ່ອນ ຕອນກຳລັງວົນກັບລະບົບແລນຂອລບໍລິສັດ ກຳລັງຄຶດຢາກເຮັດເຊີບເວີ ໃຫ້ກັບລະບົບແລນ ຫລືເວັບໄຊ ຜ່ານລະບົບແລນ, ເລີຍເຂົ້າໄປອ່ານໃນເວັບໄຊ ຂອງ appserv ປະກົດວ່າຄົນຂຽນ ເປັນຄົນໄທ ແຕ່ appserv ຖືກເອົາໄປໃຊ້ກັນທົ່ວໂລກ ແປວ່າ ໂປແກມນີ້ ກໍ່ດີຈິງ. ເຈົ້າຂອງລິຂະສິດ ຍັງແຈກໃຫ້ຟຣີ ຄືເກົ່າ ແຕ່ໃນເວັບຂອງເຂົາ ຈະມີບ່ອນໃຫ້ສາມາດບໍລິຈາກເງິນ ເພື່ອຊຸກຍູ້ໂຄງການຂອງຜູ້ຂຽນ

ຫລັງຈາກນັ້ນ ໄດ້ດາວໂຫລດມາຕິດຕັ້້ງຕາມວິທີ ທີ່ຂຽນໄວ້ໃນເວັບ ກໍ່ຮູ້ສຶກວ່າສຳເລັດ ແຕ່ປະກົດວ່າໃຊ້ບໍ່ເປັນ ກໍ່ເລີຍປ່ອຍໄປ ດົນເຕີບ

ມາສົນໃຈອີກຄັ້ງຫນຶ່ງ ຈັກແມ່ນຍ້ອນຫຍັງບຸ ຄືສິແມ່ນເຂົ້າໃຈສັບພະຄຸນຂອງ appserv ດີຂຶ້ນ ວ່າມັນສາມາດເຮັດໃຫ້ ຄົນເຮັດເວັບຈູມລາ ປະຢັດຄ່າອິນເຕີເນັດ ໄປໄດ້ຫລາຍ ເພາະສາມາດ ທົດລອງ component ຕ່າງໆ ໄດ້ໃນຄອມໂຕເອງ ບໍ່ງໍ້ເຊີບເວີ ຂອງຜູ້ບໍລິການ hosting ແລະ ທີ່ສຳຄັນ ບໍ່ຕ້ອງຈ່າຍຄ່າເນັດ ເພື່ອເຊື່ອມຕໍ່ໄປຫາເຊີບເວີ ເພາະມັນຢູ່ໃນຄອມເຮົາເອງ ຍ້ອນ appserv ໄດ້ເນລະມິດຄອມພິວເຕີຂອງເຮົາໃຫ້ກາຍເປັນເຊີບເວີ ເລີຍເອົາມາຕິດຕັ້ງໃສ່ໂນດບຸກ ກໍ່ເປັນແບບເດີມຄືໃຊ້ບໍ່ເປັນ

ໃນໄລຍະ2ເດືອນຜ່ານມາ ເວັບຈູມລາ ລະບາດ ຢ່າງຫນັກ ໃນວົງການເວັບໄຊເມືອງລາວ ຄົນໄຟຟ້າເອງ ກໍ່ສົນໃຈຂຽນເວັບຈູມລາ ກັນແລ້ວ ນັ້ນຄື ທ່ານ ບ່າວປາກເຊ (ນາມປາກກາ ໃນເວັບບອດ ຊຸມຊົນຄົນໃນວົງການໄຟຟ່າ) ກໍ່ເປັນຜູ້ຫນຶ່ງທີ່ຮຽນເຮັດເວັບຈູມລາ ຕາມການແນະນຳຈາກຂ້າພະເຈົ້າ. ໃນໄລຍະທີ່ເພິ່ນຮຽນເຮັດ ເພິ່ນຢູ່ປາກເຊ ສ່ວນຂ້າພະເຈົ້າຢູ່ວຽງຈັນ ເປັນເຫດ ໃຫ້ເພິ່ນຕ້ອງໂທທາງໄກມາ ມື້ລະຫລາຍເວລາ ເພື່ອຖາມບັນຫາ. ຂ້າພະເຈົ້າແກ້ໃຫ້ເພິ່ນໄປຈົນຫມົດພຸງ ແຕ່ບັນຫາຍັງບໍ່ຫມົດ ເດືອຮ້ອນຮອດທ່ານ os555. os555 ເລີ້ມເຂົ້າມາກ່ຽວຂ້ອງ ຕັ້ງແຕ່ ຕອນຂ້າພະເຈົ້າຊວນເພິ່ນໄປກິນເຂົ້າປຽກປາ ແລະ ທ່ານບ່າວປາກເຊ ກໍ່ໂທເຂົ້າມາຕອນ ກຳລັງກິນເຂົ້າປຽກພໍດີ ກໍ່ເລີຍ ໄດ້ອະທິບາຍບົດຮຽນຈູມລາ ກັນ ທາງໂທລະສັບ.

ທ່ານບ່າວປາກເຊ ໄປໄກກວ່ານັ້ນ ເມື່ອເພິ່ນຕ້ອງການຈົດໂດເມນ ແລະ ເຊົ່າໂຮສ. ຂ້າພະເຈົ້າ ເປັນຄົນກາງ ພາທ່ານບ່າວປາກເຊ ທີ່ເດີນທາງມາວຽງຈັນແລ້ວ ພົບກັບທ່ານ os555 ໃນຖານະ ເຈົ້າຂອງເວັບ laowebhosting.com ຜູ້ໃຫ້ບໍລິການຈົດໂດເມນ ແລະ ເຊົ້າພື້ນທີ່ເກັບເວັບໄຊ.

ຂ້າພະເຈົ້ານັດທັງສອງຄົນມາ ທີ່ຮ້ານເຂົ້າປຽກ ຂອງພະນົມສິນ (ຂາຍຕຳຫມີ່ ເຂົ້າປຽກ ເຝີ ແລະ ເຂົ້າຊອຍ ຫລວງພະບາງ ເດີ້ ອຸດຫນູນດ້ວຍ) ຫລັງຈາກເຂົາລົມກັນ ເລື້ອງທຸລະກິດກັນແລ້ວ ທ່ານບ່າວປາກເຊ ກໍ່ຊັກຖາມບັນຫາຈູມລາ ກັບທ່ານ os555 ດົນເປັນຊົ່ວໂມງ. ຫລັງຈາກນັ້ນ ຂ້າພະເຈົ້າກໍ່ຂໍຖາມຄືກັນ ຄືຖາມ ເລື້ອງຂອງ appserv ທ່ານ ໂອສ ກໍ່ເຮັດໃຫ້ເບິ່ງ 2-3 ກະບວນທ່າ

ພໍທ່ານໂອສກັບໄປ ຂ້າພະເຈົ້າກໍ່ມາລອງເອງ ກໍ່… ບໍ່ສຳເລັດ.
ເລີຍຕ້ອງໃຊ້ໂທລະສັບ ໄປຂໍຄວາມເຫັນໃຫມ່ ເລີຍຮູ້ວ່າ ເປັນນຳເວີຊັນ

ມື້ນີ້ຢາກມາຂຽນ ຫລາຍເລື້ອງສົມຄວນຢູ່ ເພາະຫ່າງຫາຍໄປດົນພໍສົມຄວນ. ຈະມາເລົ່າກ່ຽວກັບບັນດາໂຄງການຕ່າງໆທີ່ໄດ້ເຮັດ ໃນແວດວົງຂອງອິນເຕີເນັດ.

www.pnomsin.com ດ້ານເຕັກນິກແລ້ວ ກໍ່ຍັງບໍ່ໄດ້ປັບປຸງຫຍັງ ອັນເນື່ອງຈາກ ມີເວລາຈຳກັດຫລາຍ. ໄລຍະຫລັງໆນີ້ຜູ້ອ່ານຫລາຍຄົນ ທ້ວງມາວ່າ www.pnomsin.com ມີໄວຣັສ. ຫລັງຈາກຮິບໂຮມບັນດາຄວາມເຫັນແລ້ວ ສະຫລຸບໄດ້ວ່າ ຜູ້ທີ່ໃຊ້ avast ເປັນ antivirus ແມ່ນເຫັນວ່າ www.pnomsin.com ມີໄວຣັສ. ຂ້າພະເຈົ້າ ໄດ້ສົ່ງອີເມລ ໄປຫາບ່ອນທີ່ເຂົາ ໃຫ້ບໍລິການເກັບໄຟລຂອງເວັບ ເພື່ອກວດສອບ ກໍ່ໄດ້ຄຳຕອບມາວ່າ ບໍ່ມີຫຍັງ ທຸກຢ່າງປົກກະຕິ. ແລະ ຕອນນີ້ ຜູ້ທີ່ໃຊ້ avast ກໍ່ບອກມາວ່າ ບໍ່ມີໄວຣັສແລ້ວ. ໃຄແດ່. ຕອນນີ້ ຜູ້ອ່ານກໍ່ກັບມາ ຄົບຫນ້າຄົບຕາກັນເຫມືອນເດີມ ຄືປະມານ ມື້ລະ 100 ທ່ານ.

pnomsin.hollosite.com ມີອາຍຸ 3 ປີໄປແລ້ວ ແລະ ເຂົ້າສູ່ປີທີ4 ໄປແລ້ວ2ເດືອນ. ບໍ່ມີເວັບໄຊນີ້ ກໍ່ບໍ່ມີ www.pnomsin.com ເພາະທຸກຢ່າງມັນເລີ້ມຈາກບ່ອນນີ້. ຈາກການກວດສອບສະຖິຕິຜູ້ເຂົ້າຊົມ ແມ່ນມີສະເລ່ຍມື້ລະ 20 ຄົນ. ມີຫນ້ອຍ. ເຖິງວ່າຫລາຍຄົນຫັນໄປຫາ ເວັບໄຊໃຫມ່ www.pnomsin.com ແຕ່ຫລາຍຄົນເຫັນວ່າ ລະບົບໃຫມ່ ມີແນວໃຫມ່ຫລາຍເກີນໄປ ຍັງມັກແບບເກົ່າ ລຶ້ງແບບເກົ່າ(ແບບໃຫມ່ແມ່ນໃຊ້ wordpress blog, ແບບເກົ່າອອກແບບເອງກັບມື). ກໍ່ເລີຍປ່ອຍໃຫ້ມີເວັບນີ້ຕໍ່ໄປ ພຽງແຕ່ຂໍ້ມູນຕ່າງໆທີ່ເອົາມາໂຊໃນນີ້ ແມ່ນມາຈາກເວັບໃຫມ່ທັງຫມົດ ແຕ່ຈັດແຈງໃຫ້ຢູ່ໃນແບບເດີມໆ. ຍັງຈະຕ້ອງກວດຄືນ ພວກ broken link ໃນຫນ້າ links ເພາະບໍ່ໄດ້ກວດກາດົນແລ້ວ. ເຄີຍພະຍາຍາມ ຈັດຫນ້າ articles ໂດຍເອົາ joomla ມາໃຊ້ ແຕ່ໄປບໍ່ລອດ ຍ້ອນທາງເຈົ້າຂອງເວັບເພິ່ນບ້າໂຄສະນາໂພດ ໃສ່ banner ຢູ່ຫົວເວັບຍັງບໍ່ພໍ ໃສ່ໃນ front end ບໍ່ວ່າຫຍັງດອກ ມາໃສ່ໄວ້ backend ເບື້ອງຄົນບໍ່ເຫັນ ກາໄດ້ບໍ່ຂັດຂ້ອງ ແຕ່ເວລາມັນເປີດ dialogue box ເພິ່ນກໍ່ໃສ່ໂຄສະນາ ພາໃຫ້ ປຸ່ມOK ຖືກບຽດ ຈົນຫລຸດອອກໄປ ຫາປຸ່ມອັບເດດບໍ່ໄດ້ ໃຊ້ຄີບອດກົດປຸ່ມແທນ ກໍ່ຍັງບໍ່ໄດ້. ເລີຍໂຈະກ່ອນ.

Laobb.com/pnomsin ເປັນເວັບບອດ ທີ່ເຮົາໃຊ້ເກັບລາຍຊື່ຜະລິດຕະພັນຕ່າງໆ ປະມານ 3-4 ຢ່າງ ຫລາຍເດືອນຕໍ່ມາ ໄປກວດເບິ່ງ ໂອໂຫ ມີຄົນເຂົ້າເວັບບອດຫລາຍແທ້ໆ ມີກະທູ້ເກີດເປັນ1000 ແຕ່ລະກະທູ້ ຄົນອ່ານເປັນ 1000 ເທື່ອ, ທີ່ແທ້ ກໍ່ spam ທັງນັ້ນ. ເຈົ້າຂອງເວັບ ທ່ານ au8ustບອກວ່າ ຈະລ້າງໃຫມ່ຢູ່ ບໍ່ຕ້ອງໄປແກ້ໄຂຫຍັງ ເພາະຈະປ່ຽນລະບົບໃຫມ່ຢູ່ແລ້ວ.

punlao.com/pnomsin ຫລັງຈາກທີ່ punlao.com ເກີດໄດ້ປີດຽວ ແຕ່ກໍ່ກາຍເປັນເວັບໄຊ ຍອດນິຍົມໄດ້ຢ່າງໄວວາ ຖືວ່າທ່ານເຈົ້າຂອງເວັບເພິ່ນທຳການຕະຫລາດມາດີ ເພາະກະແສ social network ກຳລັງມາແຮງ ມີເວັບແບບພັນລາວເລີ້ມກໍ່ຕົວແດ່ແລ້ວ ເຊັ່ນ laobuddy, laos2009 ແລະຍັງຈະມີມາອີກຢ່າງຫລວງຫລາຍ (ມີຄົນທີ່ທຳການຕະຫລາດດ້ານນີ້ກະຊິບບອກ) ເຊິ່ງສາມາດຫາສະມາຊິກທີ່ເປັນຄົນລາວໄດ້ ເປັນພັນໆຄົນ. ອາໄສຄວາມດັງຂອງພັນລາວໃຫ້ເປັນປະໂຫຍດ ຂ້າພະເຈົ້າ ມີຫລາຍໆ campaign ເຊັ່ນ ໂຄສະນາຫາລູກຄ້າ ໃຫ້ກັບທຸລະກິດນ້ອຍໆຂອງໂຕເອງ (ຍັງບໍ່ກ້າເຮັດທຸລະກິດໃຫຍ່) ກໍ່ເຫັນວ່າ ມີຄົນສົນໃຈໃຊ້ບໍລິການຢູ່ ຂອບໃຈເວັບໄຊພັນລາວ.

ເວົ້າເລື້ອງກະແສ ຂ້າພະເຈົ້າກໍ່ລັກໄປສ້າງເວັບແບບ social network ໄວ້ຄືກັນ ພາຍໃນເວລາ 1ເດືອນ ມີສະມາຊິກ ປະມານ 30 ຄົນແລ້ວ ບໍ່ຫວັງຈະສ້າງໃຫ້ເປັນຊຸມຊົນໃຫຍ່ໂຕຫຍັງດອກ ເອົາສະເພາະ “ກຸ່ມເປົ້າຫມາຍ”.

ມື້ນີ້ມາວ່າກັນເລື້ອງການຂຽນເວັບອີກ. ການເປັນເວັບມາສເຕີ ຫລາຍຄົນກໍ່ເຂົ້າໃຈວ່າເຮົາເກັ່ງເລື້ອງ ການຂຽນເວັບ. ເຄີຍພົບກັບທ່ານ duong ເພິ່ນບອກວ່າ ດຽວນີ້ບໍ່ມີໃຜຂຽນເວັບກັນແລ້ວ ເພາະວ່າສູ່ມື້ນີ້ ມີເວັບສຳເລັດຮູບຂ້ອນຂ້າງຫລາຍ ສັບທາງວິຊາການເພິ່ນເອີ້ນວ່າ CMS ບໍ່ວ່າຈະເປັນ wordpress ທີ່ສ້າງບລັອກໃຫ້ເຮົາເອົາໄປໃຊ້ ສ້າງເປັນເວັບ ຫລື ວ່າ smf ທີ່ສ້າງເວັບບອດໃຫ້ໄດ້ແລກປ່ຽນບົດຮຽນ… ພຽງແຕ່ໄປດາວໂຫລດ ເອົາມາຕິດຕັ້ງ ຕົບແຕ່ງເລັກນ້ອຍ ຫລື ປ່ຽນ theme ຕາມໃຈ ກໍ່ເປັນເວັບມາສເຕີກັນໄດ້ແລ້ວ.

ດັ່ງນັ້ນ ນັກວິຊາການໄຟຟ້າຄືທ້າວພະນົມສິນ ກໍ່ເລີຍເປັນເວັບມາສເຕີນຳເພິ່ນ ເພາະອາໄສພີ່ລ້ຽງໃຫຍ່ ຢ່າງ os555 ແລະ au8ust ມາຊ່ວຍຕິດຕັ້ງໃຫ້ ວຽກຍາກໆ ກໍ່ເປັນອັນສຳເລັດ ສ່ວນທີ່ເຫລືອ ກໍ່ພຽງແຕ່ ຂຽນບົດ ຫາເນື້ອໃນດີໆມາປະດັບ ກັບ ໂປໂມດເວັບໃຫ້ຄົນຮູ້ຈັກ. ເລື້ອງໂປໂມດນີ້ ພີ່ລ້ຽງເພິ່ນ ກໍ່ຈັດການໃຫ້ອີກ, ມີແຕ່ສ້າງສັນຜົນງານ ຕາມຄວາມຖະຫນັດເທົ່ານັ້ນ.

ມື້ນີ້ ມີເວລາຫລາຍແດ່ ເພາະເປັນຊ່ວງພັກສົງການ ເລີຍຍາດເວລາ ມາເບິ່ງແຍງເວັບ ໂດຍສະເພາະ ດ້ານເຕັກນິກ ຂອງເວັບ ເພາະວ່າປົກກະຕິ ຈະນັ່ງຄິດວ່າຈະຂຽນຫຍັງກໍ່ເມື່ອຍແລ້ວ ເນັ້ນໃສ່ເນື້ອໃນເປັນໃຫຍ່ ດັ່ງສຸພາສິດເພິ່ນວ່າ content is the king (ຮູ້ສຶກວ່າ ມີເວລາໃຫ້ເວັບຫນ້ອຍລົງ ແລະ ການເຊື່ອມຕໍ່ ປະກົດວ່າ ນັບມື້ນັບຍາກ)

www.pnomsin.com ຖືກປ່ອຍປະມາດົນ ທັງທີ່ມັນມີອາການບໍ່ໄດ້ດັ່ງໃຈ ຕັ້ງແຕ່ມີການອັບເດດຊອບແວ ຈາກ wordpress 2.3 ເປັນຕົ້ນມາ ເຊັ່ນ: ​related post ບໍ່ມີອີກ ແລະ ບໍ່ມີທີທ່າວ່າຈະແກ້ໄດ້, excerpt ບໍ່ເຂົ້າກັນ … ໂອຍ ສະລະພັດບັນຫາ ແນວວ່າ ຄວາມຮູ້ມັນບໍ່ພໍໃຊ້. ແຕ່ກໍ່ຍັງມີບັນດາພີ່ລ້ຽງຢູ່ ທຸກບັນຫາ ມັນກໍ່ຄົງມີທາງອອກ ຖ້າເຮົາຕັ້ງໃຈແກ້.

ເວັບຈຳພວກ social network ມີນຳກັນຫລາຍເຫລືອເກີນ ອັນທີ່ດັ່ງໆ ກໍ່ມີຫລາຍ ເຮົາເຫັນວ່າມັນດັງກໍ່ເລີຍເຂົ້າໄປສະຫມັກຊື່ໆ ທັງທີ່ບໍ່ມີໃຜຮູ້ຈັກ ແລະ ບໍ່ມີໃຜຮູ້ຈັກເຮົາ, ກໍ່ພຽງແຕ່ ສ້າງ profile ປະໄວ້ ພໍຈະໄດ້ comment ຮູບຫລືບລັອກທີ່ເຮົາສົນໃຈ, ສ້າງແລ້ວ ກໍ່ບໍ່ມີການເຄື່ອນໄຫວພໍເທົ່າໃດ ໄດ້ແກ່ myspace, facebook,…ນອກຈາກສະຫມັກເອົາເອງແລ້ວ ກໍ່ຍັງມີການສະຫມັກ ຕາມຄຳເຊີນ ຂອງເພື່ອນໆ ທີ່ສົ່ງມາທາງອີເມລ, ໄດ້ແກ່ hi5, netlog, multiply (ຕອນນັ້ນຍັງບໍ່ທັນມີ punlao)…

ການສະຫມັກເວັບພວກນີ້ ກໍ່ມີຜົນດີ ຄືເປັນການສ້າງເວັບໄຊໂຄສະນາໂຕເອງ ແບບບໍ່ເສຍເງິນ ບໍ່ວ່າຄ່າສະຫມັກ, ຄ່າໂດເມນ, ຄ່າໂຮສຕິ້ງ,.. ບໍ່ເສຍຫຍັງນອກຈາກຄ່າອິນເຕີເນັດ. ນອກຈາກບໍ່ມີຄ່າໃຊ້ຈ່າຍແລ້ວ ເຮົາຍັງສາມາດ ສ້າງເວັບຂອງເຮົາເອງ ໂດຍເພິ່ນໃຫ້ເຮົາ ອັບໂຫລດຮູບໄດ້ຫລາຍ album, ບາງບ່ອນໃຫ້ອັບໂຫລດເພງ, ອັບໂຫລດວີດິໂອ..ໄວ້ແບ່ງປັນກັນກັບເພື່ອນໃນເຄືອຂ່າຍຂອງເຮົາ.

ດ້ວຍຈຸດພິເສດຄືດັ່ງນັ້ນ ຂ້າພະເຈົ້າກໍ່ໄດ້ສະຫມັກຫລາຍອັນ ແລະ ກໍ່ເອົາຮູບທີ່ໃຊ້ໃນເວັບບອດ ຢາຍໄວ້ນຳແຕ່ລະບ່ອນ ຄື:
windows live space ຮູບກ່ຽວຂ້ອງກັບຊີວິດສ່ວນຕົວ,
hi5 ຮູບກ່ຽວກັບການເຄື່ອນໄຫວ ໃນການຈັດຕັ້ງມະຫາຊົນ
multiply ການທ່ອງທ່ຽວໄປບ່ອນຕ່າງໆ
my opera ຮູບຂ່າວສານບ້ານເມືອງ ຈາກເວັບໄຊ ຫລືຈາກຫນັງສືພິມ
esnip ຮູບກ່ຽວກັບວິສະວະກຳໄຟຟ້າ
flickr ໃຊ້ເກັບຮູບກ່ຽວຂ້ອງກັບຄົນໃນວົງການໄຟຟ້າ
ອັນທີ່ໃຊ້ປະຈຳສຳລັບເວັບບອດ ຊຸມຊົນຄົນໃນວົງການໄຟຟ້າ ແມ່ນ imageshack
ສາມອັນລຸ່ມສຸດ ແມ່ນ ເວັບສຳລັບອັບໂຫລດຮູບສະເພາະ, ພວກນີ້ຈະຈຳກັດພື້ນທີ່ບໍ່ໃຫ້ເກີນກຳນົດ ດັ່ງນັ້ນ ເພື່ອບໍ່ໃຫ້ມັນເຕັມງ່າຍໆ ກໍ່ເລີຍຕ້ອງກະຈາຍຮູບໄປທົ່ວ.

ຫລ້າສຸດກໍ່ໃຊ້ laoupload ໃນການເກັບພາບ ທີ່ຖ່າຍຈາກຫນ້າຈໍ ປະເພດການໃຊ້ງານໂປແກມ ຫລື ບັນຫາຄອມພິວເຕີ, ສ່ວນພັນລາວ ກໍ່ໃຊ້ເກັບຮູບຄືກັນ ຮູບກ່ຽວຂ້ອງກັບພັນລາວ ແລະ ຮູບທີ່ຕ້ອງການແບ່ງປັນກັບຄົນພັນລາວ ເຫລົ່ານີ້ເປັນຕົ້ນ

ແລ້ວເມື່ອມີຫລາຍແບບນີ້ ຈະຈື່ຈຳ URL ໄດ້ຫມົດບໍ່ ຂ້າພະເຈົ້າມັກ search ໂດຍ ໃຊ້ຊື່ໂຕເອງ ແລະ ຊື່ເວັບ ເປັນ keyword ເຊັ່ນ pnomsin laoblogger ແບບນີ້. ສຳລັບ user name ກັບ password ແມ່ນ search ໃນ inbox ຂອງ email ໂດຍໃຊ້ຊື່ເວັບ ເປັນ keyword ເພາະເຈົ້າຂອງເວັບຈະສົ່ງຊື່ກັບລະຫັດມາໃຫ້ ຖ້າລືມ ກໍ່ reset password ເຂົາກໍ່ຈະສົ່ງມາໃຫ້ໃຫມ່

ຂຽນໄປກ່ອນ ແລ້ວຈະຕັ້ງຊື່ໂພສນຳຫລັງ. ບໍ່ໄດ້ມາຂຽນດົນສົມຄວນ ຈັກມັນເປັນນຳຫຍັງ, ສົງໄສມີເຈດຕະນາວາງມື ຈາກວົງການເວັບ ຫລືບໍ່ ກໍ່ບໍ່ຮູ້. ຄຶດວ່າມາຂຽນແດ່ກາດີ ເປັນການບັນທຶກປະສົບການ ໄວ້ອ່ານເອງກໍ່ໄດ້ ຖ້າບໍ່ມີຄົນອ່ານ ປະສົບການມັນແມ່ນຂອງເຮົາເອງຢູ່ແລ້ວ.

ມື້ນີ້ກໍ່ຄືທຸກມື້ ເວລາເຂົ້າເວັບ pnomsin.com ກໍ່ມັກໄປກວດເບິ່ງ ວ່າມີເວັບໃດ ທີ່ພາຄົນມາເວັບເຮົາແດ່. ມື້ນີ້ ກໍ່ຄືທຸກໆມື້ ເວັບທີ່ພາຄົນເຂົ້າມາ pnomsin.com ຫລາຍກວ່າຫມູ່ ກໍ່ຍັງແມ່ນ Google, ວ່າແລ້ວກໍ່ເຂົ້າໄປເບິ່ງອີກ ວ່າ Google ພາຄົນມາເວັບ ດ້ວຍ keyword ໃດ
ປະກົດວ່າ ເຂົາ search ຄຳວ່າ laoseagames2009 ແລະ pnomsin.com ຢືນຢູ່ອັນດັບ1 ແລະ 2 ໃນ 5 ລາຍການທີ່ຄົ້ນເຫັນ ອັນດັບທີ 5 ກໍ່ຍັງແມ່ນ pnomsin on technorati ອັນດັນ 4 ແມ່ນເວັບມະຫາສານ ສ່ວນອັນດັບ 3 ຫນ້າສົນໃຈ ເປັນເວັບຂອງ CIT’s Website ຫນ້າສົນໃຈເພາະວ່າ ບໍ່ເຄີຍເຫັນ ກໍ່ເລີຍເຂົ້າເບິ່ງໂດຍລະອຽດ ເປັນເວັບສຳລັບສອນຄອມ

ສະຫງວນລິຂະສິດ (2008 -2009) ໂດຍ ຈັນທະວິໄລ ບຸນທະລາ – ສູນ CIT
ສູນບຳລຸງວິຊາກ່ຽວກັບ Computer – ຮັບສ້ອມແປງ – ຕິດຕັ້ງໂປຣແກຣມ – ຮັບອອກແບບ Website –
ຮັບສ້າງຫ້ອງເຄືອຂ່າຍ (LAN,WAN,INTERNET)……
ໂທ (+856) 20 2542161

ບັນທຶກປະສົບການຊ່ຳນີ້ກ່ອນ ໃນມື້ນີ້